နိုင်ငံရေးသိပ္ပံပညာ အပိုင်း (၁၉)
ဥပဒေပြုဌာန
ပြင်ဆင်ရန်ခက်ခဲသော ဖွဲ့စည်းအုပ်ချုပ်ပုံ အခြေခံဥပဒေ၏ ကောင်းကျိုးများ
(၁) အခြေခံဥပဒေဆိုသည်မှာ အစိုးရ၏အာဏာနှင့် ပြည်သူလူထု အခွင့်အရေးများကို တိကျစွာခွဲခြား သတ်မှတ်ထားသော ဥပဒေတမျိုးပင်ဖြစ်သည်။ ဥပဒေကို ချုံ့လိုက ချုံ့၊ ဆန့်လိုကဆန့် လိုသလိုအဓိပ္ပါယ် ကောက်၍နေပါမူ ဥပဒေ၏မူလ ရည်ရွယ်ချက်ပျက်သွားပေမည်။ ပြင်ဆင်ရန်ခက်ခဲလျှင် ပြင်ဆက်ချက် နည်းပါးမည်မှာ ဓမ္မတာသဘောပင်ဖြစ်သည်။ ပြင်ဆင်ချက်နည်းပါးလေ၊ ဥပဒေ တိကျပြတ်သားမှု ပိုမိုရှိနိုင်ေလေ ဖြစ်သောကြောင့် ပြင်ဆင်ရန်ခက်ခဲသော အခြေခံဥပဒေကို ကောင်းသည်ဟု ယူဆရပေသည်။
(၂) လူထု၏နိုင်ငံရေးအသိတရားမြင့်မားမှု မရှိသောနိုင်ငံများတွင် ပြင်ဆင်ရန်ခက်သော အခြေခံဥပဒေကို အသုံးပြုခြင်းကကောင်းသည်။ လူထုအနေဖြင့် နိုင်ငံရေးအသိတရား နည်းပါးမှုကြောင့် အစိုးရ၏ဆောင်ရွက်ချက်များ ကောင်းမကောင်းကို စောင့်ကြည့်၍ ဝေဖန်ပိုင်းခြားလျက် ချုပ်ကိုင်နိုင်ခြင်း မပြုနိုင်သော်လည်း အာဏာရူးနိုင်ငံရေးသမားတို့၏ လှည့်စားမှုများ သက်သာစေနိုင်သည်။ ပြင်ဆင်ရန်ခက်ခဲမှုသည် လူထု၏အခွင့်အရေးကို ကာကွယ်မှုတစ်ရပ်ဖြစ်နိုင်သည်။ ထို့ကြောင့်ပြင်ဆင်ရန်ခက်ခဲသော ဥပဒေသည် ကောင်းသည်။
(၃) ပြည်ထောင်စုနိုင်ငံများအဖို့တွင် ပြင်ဆင်ရန်ခက်သော ဖွဲ့စည်းအုပ်ချုပ်ပုံ အခြေခံဥပဒေကိုသာ အသုံးပြုသင့်သည်။ ပြည်ထောင်စုနိုင်ငံ၌ ဗဟိုအစိုးရနှင့် ပြည်နယ်အစိုးရ တို့ အာဏာကိုခွဲဝေယူထားကြသောကြောင့် ပြင်ဆင်ရန်လွယ်ကူသော အခြေခံဥပဒေကိုသာ အသုံးပြုပါက ၎င်းဥပဒေကိုအကြောင်းပြု၍ ပြည်ထောင်စု ပြိုကွဲနိုင်ပေသည်။ ပြည်ထောင်စု တည်မြဲရေး၊ တိုးတက်ရေးတို့သည်၊ ၎င်းအခြေခံဥပဒေပေါ်၌ မူတည်လျက်ရှိသည်။ ထို့ကြောင့် အာဏာကိုခွဲဝေပေးထားသည့် ၎င်းအခြေခံဥပဒေကို ခိုင်မြဲတိကျပြတ်သားရန် လိုပေမည်။ ဤသို့ခိုင်မြဲတိကျပြတ်သားရန်မှာလည်း ၎င်းအခြခံဥပဒေကို ပြင်ဆင်ချင်တိုင်း လွယ်လွယ်ကူကူနှင့် ပြင်မရရန် လို၏။ ထို့ကြောင့် ပြည်ထောင်စုနိုင်ငံများအဖို့တွင် ပြင်ဆင်ရန်ခက်သော ဖွဲ့စည်း အုပ်ချုပ်ပုံအခြေခံဥပဒေမှာ အကောင်းဆုံးဖြစ်သည်။
ပြင်ဆင်ရန်ခက်သော ဖွဲ့စည်းအုပ်ချုပ်ပုံအခြေခံဥပဒေ၏ မကောင်းကျိုးများ
(၁) လောကတွင်အကောင်းနှင့် မကောင်းမှာ အမြဲသဖြင့်ဒွန်တွဲလျက်ရှိနေပေသည်။ ထို့ကြောင့် ကောင်းသော အချက်များရှီသည့် ပြင်ဆင်ရန်ခက်သော အခြေခံဥပဒေ၌ မကောင်းသော အချက်များလည်း ရှိနေပေလိ့မ့်မည်။ ဥပဒေဆိုသည်မှာ အခါပြုလျက်ထားလျှင် ရာသက်ပန်ကောင်းနေနိုင်သော အရာမျိုးမဟုတ်ပေ။ အခြေအနေများသည် မိနစ်၊ စက္ကန့်တိုင်းပြောင်းလဲသည်။ ထို့ကြောင့် အခြေအနေတရပ်နှင့် သင့်လျော်အောင်ပြုထားသော ဥပဒေတစ်ရပ်သည် ပြောင်းလဲနေသောအခြေအနေတစ်ရပ်နှင့်မူ သင့်လျော်လိမ့်မည် မဟုတ်ပေ။ ထို့ကြောင့်ဥပဒေကို အချိန်အားလျော်စွာ ပြင်ဆင်ရပေမည်။
(၂) ပြင်ဆင်ရန်ခက်သော အခြေခံဥပဒေမျိုးကို ပြင်ဆင်ရန်မှာ တာဝန်ကြီးလေးသည့်အပြင် ပြင်ချင်းတိုင်းပြည် ဆင်ချင်တိုင်းဆင်ရန်လည်း မလွယ်ကူလှပေ။ ထို့ကြောင့် တိုင်းပြည်၏ နိုင်ငံရေး၊ စီးပွားရေး ပေါင်းသင်းဆက်ဆံရေးနှင့် အရေးပေါ်ကိစ္စများအတွက် အခြေခံဥပဒေကို ပြင်ဆင်ရန်လိုအပ်၍ ပြင်ဆင်သောအခါ အချိန်တိုတိုတောင်းတောင်းဖြင့် ပြင်ဆင်ချက်အတည် ဖြစ်လာလိမ့်မည် မဟုတ်ပေ။ ယင်းသို့ အချိန်အခါ အခြေအနေနှင့် လိုက်လျောညီထွေစွာ ပြုပြင်နိုင်ခြင်း မရှိပါကတိုင်းပြည်တွင် မလိုလားအပ်သောကိစ္စများ ပေါ်ပေါက်လာနိုင်သည်။ ထို့ကြောင့်ပြင်ဆင်ရန် ခက်သောအခြေခံဥပဒေကို အကြွင်းမဲ့ကောင်းသည်ဟု မယူဆအပ်ပေ။
အစိုးရအဖွဲ့တစ်ခု၌
(၁) ဥပဒေပြုဌာန (Legislature)
(၂) အုပ်ချုပ်ရေးဌာန (Executive)
(၃) တရားစီရင်ရေးဌာန (Judiciary) ဟူ၍ ဌာနကြီးသုံးခုရှိသည့်အနက် ဥပဒေပြုဌာနသည် အရေးကြီးဆုံးသော ဌာနတစ်ခုဖြစ်သည်။ အကြောင်းမှာ အုပ်ချုပ်ရေးဌာနှင့် တရားစီရင်ရေးဌာန နှစ်ခုစလုံး ဥပဒေပြုဌာနပေါ်တွင် မူတည်ရသည့်အပြင် ဥပဒေဌာန၏ လက်အောက်ခံဌာနများ ဖြစ်နေသောကြောင့်ပင်ဖြစ်သည်။
No comments:
Post a Comment