နိုင်ငံရေးသိပ္ပံပညာ အပိုင်း(၆)
၆။ တပြည်ထောင်စနစ်နိုင်ငံများ၏ အားသာချက်များ
၁။ Unitary State နိုင်ငံမှာ တနိုင်ငံနှင့်အထက် နိုင်ငံငယ်ပေါင်းများစွာ ပေါင်းစပ်ပါဝင်ပြီး တနိုင်ငံတည်းအဖြစ် ပေါင်းစည်း တည်ထောင်ထားခြင်းဖြစ်သောကြောင့် ပထဝီနယ်မြေဆက်စပ်ခြင်း၊ လူမျိုးဓလေ့ထုံးစံ ညီညွတ်ခြင်း၊ မတူညီသော ယဉ်ကျေးမှုများ ပေါင်းစပ်လာခြင်း၊ လမ်းပန်းဆက်သွယ်ရေး ကောင်းခြင်းအစရှိသော အင်္ဂါရပ်များများနှင့် ပြည့််စုံပြီး အမျိုးသား စည်းလုံး ညီညွတ်မှုကို ရရှိနိုင်ခြင်း။
၂။ တတိုင်းပြည်လုံး၌ အစိုးရတရပ်တည်းသာ ရှိသောကြောင့် တိုင်းပြည်အုပ်ချုပ်ရေး စက်ယန္တရားအတွက် ပြည်ထောင်စု နိုင်ငံများကဲ့သို့ လူတော် လူကောင်းများစွာမလိုအပ်ပေ။ ပြည်ထောင်စုစစ်စစ်နိုင်ငံများတွင်မူ အစိုးရအဖွဲ့ပေါင်းများ စွာအတွက် လူတော်လူကောင်းများစွာ လိုအပ်ပေလိမ့်မည်။ လိုအပ်သော လူတော်လူကောင်းများအား ပြုစုပျိုးထောင် မွေးထုတ်မပေးနိုင်ပါက တိုင်းပြည်တိုးတတ်မှုကို ထိခိုက်စေမည်ဖြစ်သည်။
၃။အစိုးရတဖွဲ့တည်းသာရှိသောကြောင့် တိုင်းပြည်၏တာဝန်ကိုပခုံးလွှဲရန်အခွင့်မသာပေ။ ထို့ကြောင့် တာဝန်ဝတ္တရားများကို အစွမ်းကုန်ဆောင်ရွက်နိုင်သည်။ ထို့ပြင် ၎င်းအစိုးရသာ အချုပ်အခြာအာဏာပိုင်ဖြစ်သောကြောင့် ပြည်တွင်းပြည်ပ ပြဿနာများကို အနှောက်အယှက်ကင်းစွာဖြင့် လျှင်မြန်စွာဖြေရှင်းနိုင်သည်။
၄။ တိုင်းပြည်တွင်း၌ အချုအ်အခြာအာဏာပိုင် အစိုးရတဖွဲ့တည်းသာရှိသောကြောင့် ပြည်ထောင်စုနိုင်ငံများကဲ့သို့ ဗဟိုအစိုး ရနှင့် ပြည်နယ်အစိုးရများသော်လည်းကောင်း၊ ပြည်နယ်အစိုးရအချင်းချင်းသော်လည်းကောင်း အချင်းများအငြင်းပွါးရသော ကိစ္စရပ်များ မပေါ်ပေါက်နိုင်ပေ။
၅။ တမျိုးသားလုံးတွင် အစိုးရတဖွဲ့တည်းသာရှိသဖြင့် တိုင်းသူပြည်သားတိုင်းသည် ၎င်းအစိုးရ၏အမှုကိစ္စအပေါ်၌သာ သစ္စာ စောင့်သိရန်လိုသည်။
၆။ မျက်မှောက်ခေတ်တွင် အခြေအနေနှင့်လိုက်လျှော၍ အုပ်ချုပ်ရေးယန္တရားများကို အချိန်အားလျှော်စွာ ပြုပြင်ရန်လိုပေသည်။ ရုပ်ဝတ္တုများသည် အမြဲပြောင်းလဲနေသဖြင့် စိတ်ပိုင်းဆိုင်ရာဝါဒရေးရာများကိုလည်း ရုပ်ပိုင်းနှင့်လျှော်ညီစွာပြုပြင်ပြောင်းလဲရန်လိုပေမည်။ ထိုသို့ပြုပြင်ပြောင်းလဲရာတွင် Unitary State နိုင်ငံက ပြည်ထောင်စုနိုင်ငံများထက်ပို၍လျှင်မြန်လွယ်ကူပေသည်။ ထို့ကြောင့်ပင် အင်္ဂလန်သည် အမေရိကန်ထက် တနှစ်စော၍ (၁၉၁၉) ခုနှစ်တွင် အမျိုးသမီးများကို မဲပေးပိုင်ခွင့်ပြုနိုင်ခဲ့ပေသည်။
၇။ အစိုးရတဖွဲ့တည်းသာရှိသော Unitary State နိုင်ငံမှာ အစိုးရအဖွဲ့ပေါင်းများစွာရှိသော ပြည်ထောင်စုနိုင်ငံထက် အစိုးရအသုံးစရိတ်သက်သာစေပါသည်။ ထို့ကြောင့် Unitary State နိုင်ငံသားတွေသည် ပြည်ထောင်စုနိုင်ငံသားတွေထက် အခွန်ထမ်းဆောင်ရခြင်း သက်သာလေ့ရှိသည်။ ထို့ပြင် Unitary State နိုင်ငံတွင် ပြည်ထောင်စုနိုင်ငံမှာကဲ့သို့ ဥပဒေရေးရာတွင် လည်းကောင်း၊ အုပ်ချုပ်ရေးရာတွင်လည်းကောင်း ရှုပ်ထွေးခြင်းမရှိပေ။
No comments:
Post a Comment